Elpress.az xəbər verir ki, iyunun 27-si axşam saatlarından başlayaraq 28-i səhərədək Bakıda və Abşeron yarımadasında intensiv leysan yağışlarının yağacağı proqnozlaşdırılır. Havanın ildırımlı keçəcəyi, gecə saatlarında isə yağıntının daha da güclənə biləcəyi bildirilir.
Milli Hidrometeorologiya Xidmətinin məlumatına görə, iyunun 28-də paytaxt və Abşeron ərazisində temperaturun nisbətən aşağı düşəcəyi gözlənilir.
Regionlarda da qeyri-sabit hava şəraiti davam edəcək. Axşam saatlarınadək fasilələrlə yağıntı müşahidə olunacaq, bəzi ərazilərdə güclü yağış, şimşək və dolu ehtimalı var.
Yağıntılar səbəbindən Kür, Araz və Qanıx çaylarında suyun səviyyəsinin yüksələcəyi gözlənilir. Bundan başqa, bir sıra dağ çaylarında qısamüddətli sel və daşqınların baş verməsi, həssas ərazilərdə isə subasma hallarının yaranması istisna edilmir.
Mütəxəssislər vətəndaşları hava şəraiti ilə bağlı diqqətli olmağa və təhlükəsizlik qaydalarına əməl etməyə çağırıblar.
