Bakı Metropoliteninin inkişafı çərçivəsində yeni stansiyaların tikintisi və hərəkət sxemində mühüm dəyişikliklər nəzərdə tutulur.
Elpress.az xəbər verir ki, bu barədə Bakı Metropoliteninin sədri Vüsal Aslanov məlumat verib.Onun sözlərinə görə, təmir işləri başa çatdıqdan sonra Dərnəgül stansiyasından gələn qatarların xətləri ayrılacaq və sərnişinlər həmin istiqamətdən birbaşa Xətai stansiyasına hərəkət edə biləcəklər.Vüsal Aslanov bildirib ki, bu yenilik nəticəsində hazırda Cəfər Cabbarlı–Xətai istiqamətində 8 dəqiqə olan qatar intervalı təxminən 3 dəqiqəyədək azalacaq.
Metropoliten sədrinin sözlərinə görə, strateji inkişaf planına əsasən, növbəti 10 metro stansiyasının Xətai stansiyasından Həzi Aslanov istiqamətində inşa olunması nəzərdə tutulur. Xətlərin ayrılması isə bu layihənin ilk mərhələsini təşkil edir.
O qeyd edib ki, tikinti dövründə paytaxt sakinləri üçün müəyyən nəqliyyat çətinlikləri yarana bilər. Lakin metropoliten şəbəkəsinin gələcək inkişafı baxımından bu dəyişikliklərin zəruri olduğu vurğulanıb.
Həmçinin bildirilib ki, gələcəkdə hər bir metro xəttinin ayrıca deposu, infrastrukturu və hərəkət qrafiki olacaq ki, bu da metronun fəaliyyətinin daha səmərəli təşkilinə imkan verəcək.
