Kiyevdə, Ukrayna Ali Radasında milli icmaların nümayəndələri Ali Rada sədrinin birinci müavini Aleksandr Korniyenko ilə işgüzar görüş keçiriblər.
Elpress.az-ın Azərtac.az-a istinadən verdiyi məlumata əsasən, Kiyevdə keçirilən görüşdə Ukrayna Dövlət Miqrasiya Xidmətinin rəhbəri Nataliya Naumenko, Xarici İşlər Nazirliyi, Nazirlər Kabineti və Ali Radanın İnsan Hüquqları üzrə Müvəkkili Aparatının nümayəndələri, xalq deputatları və ölkədə fəaliyyət göstərən milli icmaların təmsilçiləri iştirak ediblər.Tədbirdə Azərbaycan icmasını Birləşmiş Ukrayna Azərbaycanlıları Konqresinin Aparat rəhbəri Xəyyam Dünyamalızadə təmsil edib.Görüşdə miqrasiya siyasətinin aktual məsələləri, Ukrayna Nazirlər Kabinetinin 141 nömrəli sərəncamının tətbiqindən yaranan çətinliklər, sənədləşmə prosesləri, müxtəlif kateqoriyalara aid şəxslərin hüquqi statusu və milli icmaları narahat edən digər problemlər geniş şəkildə müzakirə olunub.Xəyyam Dünyamalızadə Ukraynada yaşayan azərbaycanlıların qarşılaşdığı əsas problemləri diqqətə çatdıraraq, xüsusilə miqrasiya məsələləri, sənədləşmədə yaranan çətinliklər və soydaşlarımızın hüquq və mənafelərinin qorunması ilə bağlı mövcud vəziyyətin həllinin vacibliyini vurğulayıb.O, həmçinin Azərbaycan vətəndaşlarının Ukraynaya giriş zamanı, xüsusilə Moldovadan tranzit keçərkən üzləşdiyi çətinlikləri Xarici İşlər Nazirliyi nümayəndəsinin diqqətinə çatdırıb.Müzakirələr zamanı dövlət qurumları ilə milli icmalar arasında əməkdaşlığın gücləndirilməsinin, bütün vətəndaşlar üçün bərabər hüquq və imkanların təmin edilməsinin və Ukraynada milli həmrəyliyin möhkəmləndirilməsinin önəmi qeyd olunub.
