Abşeron rayonunda yol hərəkəti təhlükəsizliyinin təmin olunması məqsədilə polis əməkdaşları tərəfindən növbəti profilaktik tədbirlər keçirilib.
Elpress.az xəbər verir ki, DİN-in məlumatına görə, Abşeron Rayon Polis İdarəsinin Dövlət Yol Polisi Şöbəsinin həyata keçirdiyi reyd zamanı sakinlərin narahatlığına səbəb olan, yüksək səs effekti yaradan və sürücülük vəsiqəsi olmadan motosiklet idarə edən 122 nəfər saxlanılıb.
Yoxlamalar zamanı nəqliyyat vasitələrinin konstruksiyasına qanunsuz dəyişiklik edən, əlavə işıq və səsboğucu quraşdıran 30 sürücü, yükdaşıma qaydalarını pozan 11 nəfər, piyadalara yol verməyən 18 sürücü və sərxoş vəziyyətdə avtomobil idarə edən 6 nəfər barəsində də inzibati protokollar tərtib edilib.
Bildirilib ki, Abşeron rayonunda yol hərəkəti qaydalarının pozulmasının qarşısının alınması istiqamətində profilaktik və nəzarət tədbirləri bundan sonra da davam etdiriləcək.
