Avqustda nadir səma hadisəsi: Günəş 2 dəqiqədən çox müddətə yoxa çıxacaq
Elpress.az xəbər verir ki, avqustun 12-də dünyanın bəzi bölgələrində nadir astronomik hadisə – tam Günəş tutulması müşahidə olunacaq.
Xarici KİV-in məlumatına görə, Arktika, Qrenlandiya, İslandiya, eləcə də İspaniya və Portuqaliyanın bəzi ərazilərində yaşayanlar və turistlər bu unikal təbiət hadisəsini izləmək imkanı əldə edəcəklər.
Astronomların bildirdiyinə görə, tam tutulma mərhələsi 2 dəqiqə 18 saniyəyədək davam edəcək. Ən uzun müşahidə müddətinin İslandiya yaxınlığında qeydə alınacağı gözlənilir.
Qeyd olunur ki, bu, İslandiyada 1954-cü ildən, İspaniyada isə 1905-ci ildən bəri baş verəcək ilk tam Günəş tutulması olacaq.
Maraqlıdır ki, həmin gün həm də Perseid meteor yağışının pik dövrünə təsadüf edir. Mütəxəssislər bildirirlər ki, bu iki astronomik hadisənin eyni vaxta düşməsi səma müşahidəçiləri üçün nadir və unikal şərait yaradacaq.
Ekspertlər Günəş tutulmasını izləyərkən təhlükəsizlik qaydalarına ciddi əməl etməyi tövsiyə edirlər. Qismən tutulma mərhələsində yalnız xüsusi qoruyucu eynəklər və ya sertifikatlı günəş filtrlərindən istifadə edilməlidir.
Tam Günəş tutulması Ayın Yer ilə Günəş arasına keçərək günəş diskini tamamilə örtməsi nəticəsində baş verir. Bu zaman Günəşin xarici atmosferi – tacı çılpaq gözlə görünə bilir.
Bununla belə, Avropanın əksər ölkələrində, həmçinin Şimal-Qərbi Afrika, Kanada və ABŞ-ın şimal hissəsində bu hadisə yalnız qismən Günəş tutulması şəklində müşahidə ediləcək.
