Azərbaycan Prezidenti İlham Əliyevin rəhbərliyi ilə həyata keçirilən “Böyük Qayıdış” Dövlət Proqramı çərçivəsində işğaldan azad edilmiş ərazilərdə sosial infrastrukturun bərpası və əhalinin əsas xidmətlərlə təmin olunması istiqamətində tədbirlər davam etdirilir.
Elpress.az xəbər verir ki, Bu tədbirlərin tərkib hissəsi olaraq Cəbrayıl Rayon Mərkəzi Xəstəxanasının nəzdində fəaliyyət göstərəcək Şükürbəyli kənd həkim məntəqəsi istifadəyə verilib.Müəssisədə sakinlərə ilkin səhiyyə xidmətlərinin göstərilməsi üçün bütün zəruri şərait yaradılıb. Əsaslı təmir və bərpa işlərindən sonra istifadəyə verilən həkim məntəqəsində 1 həkim, 2 tibb bacısı və 1 sanitar fəaliyyət göstərəcək.Həkim məntəqəsi təxminən 2500 nəfər əhaliyə xidmət göstərəcək. Müəssisənin fəaliyyəti ilkin tibbi yardıma çıxış imkanlarının genişləndirilməsinə, profilaktik xidmətlərin gücləndirilməsinə və əhalinin sağlamlığının qorunmasına töhfə verəcək.Şükürbəyli kəndində həkim məntəqəsinin fəaliyyətə başlaması bölgədə yaşayış üçün zəruri sosial xidmətlərin formalaşdırılması, eləcə də “Böyük Qayıdış” çərçivəsində səhiyyə xidmətlərinin əlçatanlığının təmin edilməsi baxımından mühüm əhəmiyyət daşıyır.
Qeyd edək ki, həkim məntəqəsi Prezident İlham Əliyevin Şükürbəyli kəndinə səfəri zamanı verdiyi tapşırıqların icrası çərçivəsində yaradılıb.
