Elpress.az xəbər verir ki, Avropada müşahidə olunan güclü isti hava dalğası İtaliyanın ən böyük su arteriyası olan Po çayında suyun səviyyəsini rekord dərəcədə azaldıb.
Mütəxəssislərin qiymətləndirməsinə görə, mövcud vəziyyət dəyişməz qalarsa, bölgənin su ehtiyatları üç həftədən də az müddətdə kritik həddə enə bilər. Ölkənin kənd təsərrüfatının əsas mərkəzlərindən sayılan Po vadisində yaranan su qıtlığı xüsusilə məşhur Parmesan pendiri istehsalı üçün süd təmin edən təsərrüfatlarda ciddi narahatlıq yaradıb.
Məlumata görə, çayda su axını qısa müddətdə saniyədə 1500 kubmetrdən 300 kubmetrədək azalıb. Nəticədə, Adriatik dənizinin duzlu suları çayın mənsəbindən təxminən 20 kilometr içəriyə doğru irəliləyib.Mütəxəssislər bildirirlər ki, kənd təsərrüfatı torpaqlarını qorumaq üçün quraşdırılmış maneələr artıq mövcud şəraitdə kifayət qədər effektiv deyil.İtaliya Suvarma Assosiasiyası bəyan edib ki, Po çayı tarixində heç vaxt belə qısa müddətdə bu qədər sürətlə su itirməyib.Ətraf mühit təşkilatı Legambientenin nümayəndəsi Damiano Di Simine isə xəbərdarlıq edib ki, isti hava dalğası davam edərsə, bölgədə ciddi su böhranı qaçılmaz olacaq.Alimlər yaranmış vəziyyəti iqlim dəyişiklikləri ilə əlaqələndirir. Onların sözlərinə görə, Alp dağlarında qar örtüyünün vaxtından əvvəl əriməsi çayları və gölləri qidalandıran su ehtiyatlarını əhəmiyyətli dərəcədə azaldıb.Su çatışmazlığı yalnız əkinçilik sektoruna deyil, balıqçılığa da mənfi təsir göstərir. Po deltasında suyun temperaturunun 31 dərəcəyə yüksəlməsi midiya və digər molyuskların üzərində yosunların sürətlə çoxalmasına səbəb olub. Bölgədə fəaliyyət göstərən balıqçılar uzunmüddətli istilərin vəziyyəti daha da ağırlaşdırdığını bildirirlər.
