Azərbaycanda yüksək akademik göstəriciləri və texnoloji bilikləri ilə seçilən çağırışçılar üçün hərbi xidmət imkanları genişləndirilir. Artıq yalnız qəbul imtahanlarında yüksək bal toplayanlar deyil, müxtəlif texnoloji sahələrdə peşəkar bacarıqlara malik gənclər də xüsusi bölmələrdə xidmət edə biləcəklər.
Elpress.az xəbər verir ki, Müdafiə Nazirliyinin yeni yanaşmasına əsasən, Milli Müdafiə Universitetinin tabeliyindəki intellektual bölmələrə qəbul üçün seçim meyarları artırılıb. Bu barədə nazirlikdən “Report”a məlumat verilib.
Xüsusi bölmələrdə xidmət üçün aşağıdakı kateqoriyalardan ən azı birinə uyğun gələn çağırışçılar müraciət edə bilərlər:
- Dövlət İmtahan Mərkəzinin ali məktəblərə qəbul imtahanlarında 600 və daha yüksək bal toplayanlar;
- Beynəlxalq və respublika fənn olimpiadalarının, müsabiqə və yarışların müvafiq qaydada qalibləri;
- Beynəlxalq universitet reytinqlərində ilk 500-lükdə yer alan xarici ali təhsil müəssisələrinin bakalavr və magistratura məzunları;
- Xaricdə Təhsil üzrə Dövlət Proqramı çərçivəsində təsdiqlənmiş universitet və proqramların məzunları;
- İnformasiya texnologiyaları və kibertəhlükəsizlik sahəsində “Advanced” və ya “Expert” səviyyəli beynəlxalq sertifikat sahibləri;
- Robototexnika, süni intellekt, insansız sistemlər və digər texnoloji istiqamətlər üzrə ölkə və beynəlxalq yarışların qalibləri.
Seçim şərtlərinə cavab verən və Müdafiə Nazirliyinin tabeliyində müddətli həqiqi hərbi xidmət keçəcək şəxslər, eləcə də onların ailə üzvləri Milli Müdafiə Universitetinin rəsmi internet saytındakı “İntellektual bölmələr” portalı vasitəsilə elektron müraciət edə bilərlər.
Əlavə məlumat almaq istəyənlər portalın “Sənədlər” bölməsinə baxa və ya iş günləri saat 09:00-dan 17:30-dək *0811 nömrəli Çağrı Mərkəzinə zəng edə bilərlər.


