Azərbaycanda əmək bazarının gələcək inkişaf istiqamətləri, yeni peşələr və məşğulluq imkanları ilk dəfə ayrıca milli forum çərçivəsində müzakirəyə çıxarılıb.
Elpress.az xəbər verir ki, noyabrın 16-da Bakıda, “Gülüstan” Sarayında Əmək və Əhalinin Sosial Müdafiəsi Nazirliyinin tabeliyində Dövlət Məşğulluq Agentliyinin təşkilatçılığı ilə Milli Məşğulluq Forumu fəaliyyətə başlayıb. İki gün davam edəcək tədbirə dövlət qurumlarının nümayəndələri, millət vəkilləri, işəgötürənlər, təhsil mütəxəssisləri, xarici ekspertlər və gənclər qatılıblar.
Forumun gündəliyində rəqəmsallaşmanın əmək bazarına təsiri, süni intellektin yaratdığı dəyişikliklər, innovativ peşələr, peşə seçimi və dayanıqlı məşğulluq məsələləri yer alıb. Tədbir çərçivəsində müasir əmək bazarı və süni intellektlə bağlı panel müzakirələri, eləcə də müxtəlif mövzularda praktiki sessiyalar təşkil olunur.
Əmək və əhalinin sosial müdafiəsi nazirinin müavini Rəşad Mustafayevin açıqladığı məlumata görə, 2026-cı ilin ilk 10 ayında 164 mindən çox şəxs işlə təmin edilib, 14 mindən artıq vətəndaş peşə hazırlığına, 6 600-dən çox şəxs isə özünüməşğulluq proqramına cəlb olunub.
Tədbir çərçivəsində noyabrın 18-də “Gələcəyin Peşələri” Sammitinin, noyabrın 19-da isə Dövlət-Biznes Əməkdaşlıq Forumunun keçirilməsi nəzərdə tutulub. Həmçinin gənclərlə işəgötürənləri bir araya gətirəcək “İstedadlar Sərgisi” təşkil ediləcək.


