Rusiyanın Volqoqrad şəhəri iyulun 27-nə keçən gecə raket hücumuna məruz qalıb.
Yerli sakinlər şəhərdə bir neçə güclü partlayışın baş verdiyini, ardınca isə yanğının yarandığını bildiriblər. Elpress.az xəbər verir ki, OSINT analitiklərinin məlumatına görə, hücumun əsas hədəfi Rusiyanın hərbi-sənaye kompleksinin mühüm müəssisələrindən biri hesab edilən “Titan-Barikadı” zavodu olub. Bildirilir ki, bu müəssisədə “İsgəndər-M”, “Topol-M” və “Yars” raket kompleksləri istehsal edilir.Sosial şəbəkələrdə hücum anını əks etdirdiyi iddia olunan videogörüntülər yayılıb. ASTRA nəşri zərbələrin Ukraynanın uzaqmənzilli “Flaminqo” qanadlı raketləri ilə endirildiyini yazsa da, bu məlumat hələlik rəsmi şəkildə təsdiqlənməyib.Volqoqrad vilayətinin qubernatoru Andrey Boçarov Ukrayna raketlərinin şəhərə hücum etdiyini təsdiqləyib. Onun sözlərinə görə, Krasnooktyabr rayonunda yerləşən sənaye müəssisələrindən birinin istehsal sahələrinə ziyan dəyib.İlkin məlumata əsasən, hadisə nəticəsində 10 nəfər xəsarət alıb.
Qeyd edək ki, zərbə endirildiyi iddia olunan “Titan-Barikadı” zavodu da məhz Volqoqradın Krasnooktyabr rayonunda yerləşir.
