Bakıda faciəvi partlayışla bağlı yeni mərhələ: Təqsirləndirilən şəxslər Ali Məhkəməyə müraciət etdilər
Elpress.az-ın Oxu.az-a istinadən verdiyi məlumata əsasən, Bakıda 10 nəfərin ölümü, 23 nəfərin isə müxtəlif dərəcəli xəsarət alması ilə nəticələnən ağır partlayış hadisəsi üzrə növbəti məhkəmə prosesi keçiriləcək. Cinayət işi üzrə təqsirli bilinən şəxslər barələrində çıxarılmış məhkəmə hökmündən kassasiya şikayəti verərək Ali Məhkəməyə müraciət ediblər.Kassasiya şikayətləri “Bakı Ağac Emalı” ASC-nin faktiki sahibi, 1962-ci il təvəllüdlü Tağı İbrahimov və müəssisədə inzibati-təsərrüfat idarəçiliyini həyata keçirən 1992-ci il təvəllüdlü Toğrul Rzayev tərəfindən təqdim olunub.Məlumata görə, işə Ali Məhkəmədə hakim Teyyub Muxtarovun sədrliyi ilə fəaliyyət göstərən məhkəmə kollegiyası baxacaq. Kassasiya şikayətləri üzrə ilkin baxış iclasının 15 iyul tarixinə təyin olunduğu bildirilib.Qeyd edək ki, sözügedən partlayış ölkədə son illərin ən ağır faciələrindən biri hesab olunur. Hadisə nəticəsində 10 nəfər həyatını itirib, 23 nəfər müxtəlif dərəcəli bədən xəsarətləri alıb. Kassasiya mərhələsində məhkəmə aşağı instansiya məhkəmələrinin qəbul etdiyi qərarların qanunauyğunluğunu araşdıracaq.
