Türkiyədə maliyyə bazarlarında aparılan əməliyyatlarla bağlı araşdırma ölkənin keçmiş hökumət üzvlərindən birinin həbsi ilə nəticələnib. Söhbət sabiq Ailə və Sosial Xidmətlər naziri Fatma Betül Sayan Kayadan gedir.
Elpress.az xəbər verir ki, İstanbulda fond əməliyyatları ilə bağlı aparılan istintaq çərçivəsində Kaya “Kapital bazarı haqqında” qanunu pozmaqda və cinayət törətmək məqsədilə yaradılmış təşkilata üzv olmaqda şübhəli bilinərək saxlanılıb. Prokurorluqda 2 saat 15 dəqiqə davam edən ifadəsindən sonra o, həbs tələbi ilə məhkəməyə göndərilib. Məhkəmə barəsində həbs qətimkan tədbiri seçib.
Eyni iş üzrə onun həyat yoldaşı İlyas Kaya və Türkiyənin keçmiş Kapital Bazarları Şurasının (SPK) sədri İbrahim Ömer Gönül barəsində fərqli qərar qəbul edilib. Hər iki şəxsə ölkədən çıxış qadağası qoyulub və mütəmadi olaraq polis orqanlarında imza atmaq öhdəliyi müəyyənləşdirilib.
İstintaqın mərkəzində milyardlarla lirəlik səhm əməliyyatı dayanır
Araşdırmanın əsas istiqamətlərindən biri “Özata Denizcilik” şirkətinin Borsa İstanbulda OZATD kodu ilə satılan səhmləri üzrə əməliyyatlardır.
Türkiyə mətbuatının prokurorluğun məhkəməyə təqdim etdiyi sənədlərə əsaslanan məlumatına görə, Fatma Betül Sayan Kaya 2026-cı ilin aprelində şirkətin səhmlərini əldə edib. İstintaq materiallarında onun səhm əməliyyatları zamanı ictimaiyyətə açıqlanmamış məlumatlara malik ola biləcəyi iddia olunur.
Prokurorluğun sənədlərində səhmlərin sentyabrın 16-da, fondların ləğvi ilə bağlı qərardan bir gün əvvəl Tera Yatırım şirkətinə köçürüldüyü və satış məbləğinin həmin gün hesaba daxil olduğu bildirilir. Bu əməliyyatın vaxtı və həyata keçirilmə üsulu istintaqın diqqət mərkəzindədir.
Sentyabr ayında Türkiyədə müzakirələrə səbəb olan iddialara əsasən, Kaya və həyat yoldaşının səhm əməliyyatlarından təxminən 2,17 milyard Türkiyə lirəsi gəlir əldə etdiyi irəli sürülüb. Bu məbləğ təxminən 43 milyon ABŞ dollarına bərabərdir.
Sabiq nazir siyasi vəzifələrindən də ayrılmışdı
Fatma Betül Sayan Kaya Türkiyədə 2016–2018-ci illərdə Ailə və Sosial Siyasətlər naziri vəzifəsində çalışıb. Daha sonra hakim Ədalət və İnkişaf Partiyasında (AKP) sədr müavini olub.
O, 26 sentyabr 2026-cı ildə fondlarla bağlı iddiaların araşdırılmasına maneə yaranmaması üçün partiyadakı vəzifələrindən azad edilməsini istəyib.
Qeyd edək ki, hazırda Kaya barəsindəki ittihamlar istintaq və məhkəmə araşdırması çərçivəsində irəli sürülüb. Onun təqsiri məhkəmənin yekun hökmü ilə sübuta yetirilməyib.
