Dunkan Norman iki britaniyalı nazirin yaxın aylarda Azərbaycana səfər edəcəyini açıqlayıb
Elpress.az xəbər verir ki, Böyük Britaniyanın Azərbaycandakı səfiri Dankan Norman iki ölkə arasında münasibətlərin qarşıdakı illərdə daha da inkişaf edəcəyini bildirib.Diplomatik korpusun Qarabağ və Şərqi Zəngəzura səfəri çərçivəsində danışan səfir qeyd edib ki, Azərbaycan-Britaniya əlaqələrinin 10 ildən sonra indiki səviyyədən daha yüksək mərhələyə çatacağı gözlənilir.Onun sözlərinə görə, gələcəkdə Azərbaycanda daha çox Britaniya şirkətinin fəaliyyət göstərməsi, təhlükəsizlikdən iqtisadi inkişafa qədər müxtəlif istiqamətlərdə əməkdaşlığın genişləndirilməsi və qarşılıqlı səfərlərin artırılması nəzərdə tutulur.Dunkan Norman bildirib ki, ilk növbədə iki ölkə arasında strateji tərəfdaşlıq məsələsi yekunlaşdırılmalı və müvafiq sənəd imzalanmalıdır. Səfir bunun yaxın gələcəkdə baş verəcəyinə ümid etdiyini deyib.O əlavə edib ki, bundan sonra bir sıra yeni birgə layihələrin həyata keçirilməsi planlaşdırılır. Bu layihələr arasında süni intellekt və texnologiya sahəsində əməkdaşlıqların da yer alacağı bildirilib.Səfir həmçinin yaxın bir ay ərzində iki Britaniya nazirinin Azərbaycana səfər edəcəyini açıqlayıb. Onun sözlərinə görə, nazirlərdən biri sentyabrın sonunda, digəri isə oktyabr ayında ölkəyə səfər edəcək.
