Tərəflər sərhədkeçmə proseslərinin sürətləndirilməsi və gömrük prosedurlarının sadələşdirilməsini müzakirə edib
Elpress.az xəbər verir ki, Azərbaycan Dövlət Gömrük Komitəsi ilə Türkiyənin Ticarət Nazirliyi arasında Gömrük Məsələləri üzrə Birgə Komitənin 6-cı iclası keçirilib.Görüşdə iki ölkənin gömrük orqanları arasında əməkdaşlığın hazırkı vəziyyəti nəzərdən keçirilib. Yeni Kompüterləşdirilmiş Tranzit Sisteminin (NCTS) tətbiqi ilə bağlı Türkiyənin təcrübəsinin öyrənilməsi, gömrük prosedurlarının sadələşdirilməsi və sərhədkeçmə proseslərinin sürətləndirilməsi məsələləri müzakirə olunub.Tərəflər TIR və e-TIR mexanizmlərinin tətbiqi üzrə əməkdaşlığın inkişaf etdirilməsi, sərhəd buraxılış məntəqələrindən daha sürətli keçidin təmin edilməsi və yük nəqliyyat vasitələrinin buraxılış imkanlarının artırılması barədə fikir mübadiləsi aparıblar.İclasda gömrük sahəsində məlumat mübadiləsinin genişləndirilməsi, hüquqpozmalarla mübarizə, səlahiyyətli iqtisadi operator, güzgülü gömrük statistikası və risklərin idarəedilməsi istiqamətləri də diqqət mərkəzində olub.Bundan əlavə, qabaqcıl təcrübələrin qarşılıqlı öyrənilməsi, birgə əməliyyatların və təlimlərin keçirilməsi imkanları nəzərdən keçirilib.Görüşün sonunda müzakirə olunan məsələləri və əldə edilmiş razılaşmaları əks etdirən protokol imzalanıb.
