Hövsandakı “Duzlu göl” hər il yüzlərlə insanın üz tutduğu müalicəvi məkanlardan biri olsa da, həkimlər palçıqdan istifadənin riskləri barədə xəbərdarlıq edirlər.
Elpress.az-ın Oxu.az-a istinadən verdiyi məlumata əsasən, Paytaxtın Suraxanı rayonu ərazisində, Hövsan-Zığ yolu yaxınlığında yerləşən “Duzlu göl” yay mövsümündə yüzlərlə insanın üz tutduğu məkanlardan birinə çevrilib. Sakinlər gölün palçığının müxtəlif sağlamlıq problemlərinə müsbət təsir göstərdiyini desələr də, mütəxəssislər ehtiyatlı olmağa çağırırlar.Buraya gələn vətəndaşlar palçıq müalicəsinin oynaq, sümük və digər ağrılarını azaltdığını bildirirlər. Onların sözlərinə görə, uzun illərdir istifadə etdikləri bu üsul nəticəsində sağlamlıqlarında müəyyən yaxşılaşma müşahidə ediblər.Bununla belə, həkim İradə Hacıyeva palçıq müalicəsinə başlamazdan əvvəl mütləq tibbi müayinədən keçməyin vacibliyini vurğulayıb. O bildirib ki, palçığın tərkibi analiz edilməyibsə və bu müalicə həkim tərəfindən tövsiyə olunmayıbsa, özbaşına istifadə ciddi sağlamlıq riskləri yarada bilər.Həkimin sözlərinə görə, bəzi insanlar müvəqqəti rahatlama hiss etsələr də, onurğa yırtığı, protruziya və ya onkoloji xəstəliklər kimi hallarda palçıqdan həkim məsləhəti olmadan istifadə xəstəliyin daha da ağırlaşmasına səbəb ola bilər. Buna görə də belə müalicə üsuluna başlamazdan əvvəl mütləq mütəxəssis rəyi alınmalıdır.
