Azərbaycanda 2027-ci ildə onkoloji xəstəliklərin müalicəsi, xəstələrin reabilitasiyası və dərman təminatı üçün dövlət büdcəsindən 65,9 milyon manat vəsait ayrılması planlaşdırılır.
Bu məbləğ Milli Onkologiya Mərkəzi və Azərbaycan Tibb Universitetinin Onkoloji Klinikası arasında bölüşdürüləcək.
Layihəyə əsasən, 2027-ci ildə səhiyyə sahəsinə ümumilikdə 2 milyard 84,1 milyon manat xərclənməsi planlaşdırılır. Bu, 2026-cı ilin göstəricisindən 59,8 milyon manat çoxdur. Səhiyyə xərclərinin dövlət büdcəsində payı 4,9 faiz təşkil edəcək.
Bundan başqa, icbari tibbi sığortanın maliyyələşdirilməsi üçün 1,1 milyard manat ayrılması nəzərdə tutulub. Bu məbləğ cari illə müqayisədə 200 milyon manat və ya 22,2 faiz artıqdır.
Səhiyyə Nazirliyinin müxtəlif tədbirlərinin maliyyələşdirilməsi üçün 99,6 milyon manat, Akademik Zərifə Əliyeva adına Milli Oftalmologiya Mərkəzinin fəaliyyəti üçün isə 8,6 milyon manat vəsait planlaşdırılıb.
Qeyd edək ki, 2027-ci il dövlət büdcəsinin layihəsi hazırda Milli Məclisdə müzakirə olunur. Təklif olunan vəsaitlər qanun layihəsinin təsdiqlənməsindən sonra qüvvəyə minəcək.


